UP PLATT

Von WOLFGANG MAHNKE

(aus: Ostsee-Zeitung 7.8. 2010)

Johann, bliew hier – bliew hier Johann!
Wat wist du in Afghanistan?
Denk noch eins nah in aller Rauh
Lat mit di räden, hür mi tau:

Worüm wist du in dei wilde Welt?
Kann sin, di lockt dat väle Geld.
Un wenn di in Afghanistan
’n Kugel dröppt von’n Taliban?

In’n Sarg kümmst trügg, ganz musingdod!
Marik rort sick ehr Ogen rod:
För wän un wat müsst hei sien Läwen
Wietweg an’n Hindukusch hengäwen?

Kiek, wer man will, un wer man mag,
Dei kümmt ok an sien’n leegsten Dag
Noch trecht in uns’ oll Mäkelbörg.
Un schleit sick grad bi uns noch dörch.

Hür tau, wat dien oll Mudder seggt,
Un wat ick di an’t Hart hew leggt,
Un ok Marik. Bliew hier Johann!
Wat wist du in Afghanistan!

(Nah John Brinckman: „Fastelabendspredigt för Johann“)